శివుడు లింగరూపంలో వెలసిన ఈ ఆలయంలో విశేషం ఏంటంటే శివుడు ఐదు ముఖాలు గల నల్లని శివలింగం భక్తులకి దర్శమిస్తూ విశేషంగా ఆకట్టుకుంటుంది. శివుడు ఇలా దర్శనమిచ్చే చాలా అరుదైన ఆలయంగా ప్రసిద్ధి చెందింది. మరి ఈ శివలింగం ఎక్కడ ఉంది? ఈ ఆలయ విశేషాలు ఏంటి? ఈ ఆలయం ఎక్కడ ఉందనే విషయాల గురించి మనం ఇప్పుడు తెలుసుకుందాం. 
ఆంధ్రప్రదేశ్ రాష్ట్రం, కృష్ణాజిల్లా, చందర్లపాడు మండలం కాండ్రపాడు గ్రామంలో శ్రీ పంచముఖేశ్వర శివలింగ ఆలయం ఉంది. ఈ ఆలయంలో నాలుగున్నర అడుగుల ఎత్తు, మూడున్నర అడుగుల చుట్టుకొలత గల నల్లని శివలింగం ఉంది. ఈ నల్లని శివలింగానికి అగ్రభాగాన ఐదు ముఖాలు కలిగిన ఒక అపురూప శివలింగం ఉంది. 
ఈ ఆలయంలో మరొక విశేషం ఏంటంటే, ఆలయంలోని ప్రధాన శివలింగానికి పానవట్టం లేదు. అందుచేత గ్రామస్థులు స్థానికంగా దొరికే రాతినే పానవట్టంగా చెక్కించి, ప్రతిష్టించి పూజాదికాలను నిర్వహించారు. తరువాత జరిగిన కార్యక్రమాలలో భాగంగా ఆ ఆలయాన్ని పునర్నిర్మించి ఎత్తైన పానవట్టం మీద స్వామివారిని ప్రతిష్టించి, ఆనాడు లభించిన నాలుగు శివలింగాలను ఆలయానికి నాలుగు వైపులా ప్రతిష్టించారు.
ఈ శివలింగ మూర్తి పాటిమన్ను త్రవ్వకాలలో 1937 ఈశ్వరనామ సంవత్సరం చైత్రశుద్ద పంచమి రోహిణి నక్షత్రం గురువారం ఉదయం 10 గంటలకి లభించిందని పెద్దలు చెబుతున్నారు. ఈ శివలింగం లభించిన ప్రాంతంలోనే మరికొన్ని చిన్న విగ్రహాలు కూడా లభించాయి. 
అయితే తూర్పు వైపున ఉన్న స్వామివారిపై సంధ్యా కిరణాలూ పడే విధంగా ఈ ఆలయాన్ని నిర్మించారు. పంచముఖేశ్వర స్వామికి కుడివైపున ఉన్న ఉపాలయంలో శ్రీవల్లి దేవసేన సమేత శ్రీ సుబ్రహ్మణ్యేశ్వర స్వామి, ఎడమ వైపున ఉన్న ఉపాలయంలో శ్రీ రాజేశ్వరీదేవి ప్రతిష్ఠితులై ఉన్నారు. 
ఈ ఆలయంలో నిత్యపూజలతో పాటు, కార్తీకమాసంలో దీపోత్సవం, మహాశివరాత్రికి కళ్యాణం చాలా గొప్పగా నిర్వహిస్తారు.
