తిరుమలలో ఏడూ కొండల పైన వెలసిన శ్రీ వెంకటేశ్వర స్వామి వారి ఆలయం సందర్శించాడనికి ప్రపంచం నలుమూల నుండి లక్షల సంఖ్యల్లో భక్తులు వస్తుంటారు.
ప్రపంచంలోనే ఎక్కువ మంది హిందువులు దర్శించుకునే ఆలయాలలో తిరుమల తిరుపతి దేవస్థానం ఒకటి అని చెప్పవచ్చు.
ఈ ఆలయంలో వెలసిన వెంకటేశ్వర స్వామిని కలియుగ ప్రత్యక్ష దైవంగా భావిస్తారు. కేవలం తిరుపతిలో ఉండే వెంకటేశ్వరస్వామిని మాత్రమే కాకుండా మనదేశంలో వివిధ ప్రాంతాలలో ఉండే వెంకటేశ్వర స్వామిని సాక్షాత్తు కలియుగ దైవంగా భావించి పెద్ద ఎత్తున పూజలు నిర్వహిస్తుంటారు. ఈ విధంగా ప్రసిద్ధి చెందిన దేవాలయాలలో అనంతపురంలోని తాడిపత్రిలో ఉన్నటువంటి చింతల వెంకటరమణ స్వామి ఆలయం ఒకటని చెప్పవచ్చు. ఈ ఆలయం విశిష్టత ఏమిటో తెలుసుకుందాం…
అనంతపురం జిల్లాలో ఎంతో ప్రసిద్ధి చెందిన చింతల వెంకటరమణ స్వామి దేవాలయం విజయనగర రాజులు నిర్మించినది. దీనిని క్రీ.శ.1460 – 1525 లో నిర్మించారు. ఎంతో అద్భుతమైన శిల్పకళతో రూపొందించిన ఈ ఆలయం ప్రపంచ వారసత్వం పొందింది.
పెన్నా నది ఒడ్డున దాదాపు 5 ఎకరాల స్థలంలో ఈ ఆలయం విస్తరించి ఉంది. పూర్వం ఈ ప్రదేశంలో ఎక్కువగా చింత చెట్లు ఉండేవి. ఈ క్రమంలోనే ఓ పెద్ద చింత చెట్టు నుంచి పెద్ద పెద్ద శబ్దాలు వినిపించడంతో స్థానికులు అక్కడికి వెళ్లి చూడగా ఆ చింత చెట్టు తొర్రలో విష్ణువు విగ్రహం కనిపించింది.
ఆ విధంగా చింత చెట్టు నుంచి లభించిన విగ్రహానికి విజయ నగర రాజులు ఆలయం నిర్మించడం వల్ల ఇక్కడ వెలసినటువంటి స్వామి వారిని చింతల వెంకటరమణ స్వామిగా భక్తులు పూజిస్తారు.
ఈ ఆలయంలో కొలువై ఉన్న స్వామివారు చింతచెట్టు తొర్రలో దొరకడం వల్ల ఇక్కడి స్వామిని చింతల తిరువేంగళ నాథ స్వామి అని పిలిచే వారు. క్రమంగా చింతల వేంకటేశ్వర స్వామి లేదా చింతల వేంకటరమణ స్వామి అని పిలుస్తున్నారు. ఈ ఆలయంలో ఎన్నో ప్రత్యేకతలు దాగి ఉన్నాయి.
ఈ ఆలయంలో సూర్య కిరణాలు గర్భ గుడిలోని స్వామి వారి పాదాలను తాకుతాయి. గర్భగుడిలో ఉన్నటువంటి స్వామివారి మూలవిరాట్ దాదాపు పది అడుగుల ఎత్తు ఉంటుంది. ప్రతి సంవత్సరం ముక్కోటి ఏకాదశిని పురస్కరించుకొని మూడు రోజులపాటు వరుసగా సూర్యకిరణాలు స్వామివారి పాదాలను తాగడం ఈ ఆలయ ప్రత్యేకత అని చెప్పవచ్చు.
