దేవుడికి కొబ్బరికాయ కొట్టి దాన్ని ప్రసాదంగా మనం కూడా తీసుకుంటాం. రకరకాల వంటల్లో కూడా వినియోగిస్తూ ఉంటాం. కొబ్బరితో స్వీట్స్ చేసుకున్నా, చట్నీ చేసుకున్నా రుచితోపాటు ఆరోగ్యానికీ మేలు చేస్తుంది. ఈ కొబ్బరిలో పోషకాలు అపారంగా ఉన్నాయంటున్నారు ఆరోగ్య నిపుణులు.
పచ్చి కొబ్బరిలో కాపర్, ఐరన్, మెగ్నిషియం, మాంగనీస్, పాస్ఫరస్, పొటాషియం, సెలీనియం, జింక్, విటమిన్ బి1, బి5, బి9 తదితర విటమిన్లు, మినరల్స్ పుష్కలంగా ఉంటాయి. అందువల్ల మన శరీరానికి పోషణ లభిస్తుంది. ఇంకా చెడు కొలెస్ట్రాల్ను తగ్గించడానికి పచ్చి కొబ్బరి దోహదపడుతుంది.
కొబ్బరిలో పీచు పదార్థం అధికంగా ఉంటుంది. దీనిని తినడం వల్ల శరీరంలోని కొవ్వు దూరం అవుతుంది. బరువు తగ్గాలనుకునేవారికి ఇది చక్కని ఆహారంగా చెప్పొచ్చు. కాబట్టి వెయిట్లాస్ కోసం తాపత్రయపడే వారు తమ డైట్లో పచ్చి కొబ్బరిని కూడా చేర్చుకోవాలని చెబుతున్నారు నిపుణులు. ఏ కాలంలోనైనా కొబ్బరి దొరుకుతుంది కాబట్టి హ్యాపీగా ఈ పచ్చి కొబ్బరిని తీసుకోవచ్చు.
గుండె సంబంధిత సమస్యలున్నవారు పచ్చి కొబ్బరిని తింటూ వుంటే గుండె ఆరోగ్యం మెరుగుపడుతుంది. రక్తసరఫరా మెరుగుపడి హైబీపీ తగ్గుతుంది. డయాబెటిస్ ఉన్నవారు పచ్చి కొబ్బరిని తింటే వారి రక్తంలో ఉన్న షుగర్ లెవల్స్ కంట్రోల్ అవుతాయి.
పచ్చికొబ్బరిలో యాంటీ ఆక్సిడెంట్లు పుష్కలంగా ఉంటాయి. అందువల్ల మన శరీర రోగ నిరోధక శక్తి పెరుగుతుంది. ఇన్ఫెక్షన్ల నుంచి రక్షణ లభిస్తుంది. జీర్ణ సమస్యలు ఉన్నవారు పచ్చి కొబ్బరి తినాలి. తద్వారీ అజీర్తి, అసిడిటీ తగ్గిపోతుంది. కొబ్బరిలో ఉండే కొవ్వు పదార్థాలు మూర్ఛ మరియు అల్జీమర్స్ వంటి మెదడు రుగ్మతల నుంచి కాపాడుతాయి. అంతేకాదు కొబ్బరి మేధోశక్తిని పెంచుతుంది.
కొబ్బరి మూత్ర విసర్జనలో ఇన్ఫెక్షన్లకు చికిత్స చేస్తుంది. ఇది సహజంగా పనిచేసి ఆరోగ్యాన్ని మెరుగుపరుస్తుంది. తరుచుగా కొబ్బరిని ఆహారంలో తీసుకునే వారికి మలబద్ధకం, థైరాయిడ్ సమస్యలు దూరంగా ఉంటాయి.